Óhætt er að segja að góður andi hafi ríkt á ráðstefnunni Brjótum múra! sem fram fór á Akranesi 4. og 5. nóvember. Aðsókn var góð, vel á annað hundrað manns báða dagana, og sérstaklega ánægjulegt að sjá hversu góð þátttaka var meðal innflytjenda sem tóku virkan þátt sem framsögumenn, þátttakendur í panel og almennir gestir.

Markmiðið með ráðstefnunni var að stuðla að opinni og einlægri samræðu um fjölmenningarsamfélagið og málefni innflytjenda, Það tókst með eindæmum vel. Líflegar umræður spunnust í sal og margir höfðu á orði hversu gagnlegt það væri að heyra reynslusögur þeirra sem þekkja það af eigin raun að vera innflytjendi í íslensku samfélagi.

Þá var góður rómur gerður að þeim erindum sem flutt voru á ráðstefnunni. Guðbjartur Hannesson, velferðarráðherra, setti ráðstefnuna föstudaginn 4. nóvember. Í kjölfarið steig í pontu Aleksandra Chilipala sem opnaði augu ráðstefnugesta fyrir því að sálrænt álag sem fylgir því að flytja á milli menningarheima getur verið gríðarlegt og að mikilvægt sé að vinna með það. Íris Björg Kristjánsdóttir, formaður Innflytjendaráðs, gerði grein fyrir hlutverki stjórnvalda og sagði frá þeirri stefnumótun og vinnu sem Velferðarráðuneytið hefur unnið í málaflokknum. Þorvaldur Friðriksson talaði um mikilvægi þess að skrá sögu innflytjenda sem flytja til Íslands, einsog gert var í árdaga byggðar á Íslandi. Þannig mætti auka skilning og virðingu manna á milli. Eiríkur Bergmann stiklaði á stóru um sögu fólksflutninga og fjölmenningar í Evrópu með sérstaka áherslu á pólitísk viðbrögð við þeirri þróun.

… Lesa meira

> Sjá myndir frá ráðstefnunni

Anna Kirova sérfræðingur á Menntavísindasviði í háskólanum í Alberta í Kanada (með sérstaka áherslu í málefnum barna og fjölskyldum innflytjenda) verður á Íslands næstu dagana í tengslum við ráðstefnuna Brjótum múra.

Anna býður skólafólki til fundar, í bæjarþingsalnum á Akranesi mánudaginn 31. október kl 14:00-15:30, um málefni barna og fjölskyldna innflytjenda. Það sem hún mun leggja áherslu á í erindi sínu er m.a. niðurstöður nýjustu rannsókna í Kanada um mikilvægustu atriðin sem þarf að hafa í huga í tengslum við börn innflytjenda, hvernig getum við best stutt foreldra og börn og boðið upp á haldgóða menntun.

Skólafólk er hvatt til að mæta og hlýða á erindi hennar og spyrja spurninga.

> Nánar um dagskrá ráðstefnunnar Brjótum múra hér í vefnum.

Rauði krossinn á Akranesi, Akraneskaupstaður og fleiri góðir aðilar boða til ráðstefnu í Tónbergi á Akranesi 4. og 5. nóvember n.k. undir yfirskriftinni BRJÓTUM MÚRA!

Ráðstefnan er um forsendur, kosti og áskoranir fjölmenningarsamfélaga, en ráðstefnan er liður í samnefndu verkefni sem styrkt er af Progress áætlun Evrópusambandsins.

Málefni tengd innflytjendum eru frekar ný í íslenskum veruleika og þróunin hér á landi átti sér stað talsvert síðar en í löndunum í kringum okkur. Þetta geriri okkur kleift að nýta þá þekkingu og reynslu sem safnast hefur og læra af mistökum annarra.

Undirbúningsfundur fyrir ráðstefnuna BRJÓTUM MÚRA var haldinn í höfuðstöðvum RKÍ miðvikudagskvöldið 19. október 2011. Þar funduðu nokkrir af þeim sem taka munu þátt í pallborðsumræðum á ráðstefnunni.

Til þess að ráðstefna sem þessi skili tilætluðum árangri er nauðsynlegt að fá sem flesta til þess að taka þátt og láta sig viðfangsefnið varða. Hvernig samfélag okkar þróast er málefni sem snertir okkur öll og við ættum ekki að láta hendingu ráða hvert sú þróun leiðir okkur.  Okkar markmið er að þátttakendur haldi umræðunni áfram á sínum vettvangi og þannig takist okkur saman að skapa lifandi samræðu sem lifir þennan afmarkaða viðburð og hefur áhrif til framtíðar. Þess vegna þurfum við þína hjálp.

Með þessu erindi viljum við óska eftir því að þú gangir til liðs við okkur með því að skrá þig til þátttöku á ráðstefnunni, og hvetja a.mk. 4 aðra til þess sama. Ef 40 einstaklingar einsetja sér að taka þátt í ráðstefnunni og bjóða jafnframt með sér 4 aðilum sem hafa áhuga á því hvernig samélag okkar þróast, mun okkur takast að kalla til samfundar 200 manns til þess að ræða það sem ýmisir hafa sagt brýnasta viðfangsefni 21. aldarinnar.

Hér í vefnum okkar getur þú lesið meira um ráðstefnuna og SKRÁÐ ÞIG.